E Referänz zu de Küürs

UUS EM LÄLLI, dr Zytschrift vo dr Baseldytsche Biini
Baseldytsch-Kiirs

Zwische 2003 und 2007 het die "Baseldytschi Bihni“ iire Mitgliider säggs Kuursraaien aabote, wo dr Carl Miville glaitet het. Ab und zue froogen au hitte no ainzelni Mitgliider, eb dä Kuurs wideremool stattfindet. Mer sin mid em Kuurslaiter zem Schluss koo, die Kiirs nid wyter z fiere. D Noofroog isch nim so grooss, und s isch scho bi de letschten Aagibot schwiirig gsii, vier Eebe z finde, wo gnueg  Intressierten in ire Kaländer basst häte.

Gliggligerwyys git s aber no anderi, seer gueti Aagibot fir Lyt, wo sich fir e guet Baseldytsch intressiere. Dr Carl Miville empfiilt ganz bsunders d Brogramm vom Heer Werner Lukas (Tel. +41 (0)61 461 40 49 oder +41 (0)79 225 77 87), wo under em Bigriff “baaseldütsch und dütlig“ nid numme Baseldytschkiirs aabieted, nai, är het e ganzi Raaie vo Aggtivideeten und Aaless "uf Laager". Uf syner Websyte www.baasel-dütsch.ch findet men Informazioone, wo jeede Frind vo unserem Dialäggt gluschtig machen und verschiidenschten Aasprich grächt wäärde.
                                                                                                                      w. r. / Dezämber 2008